ನಿನ್ನೆಗಳಲ್ಲಿ ಮಲೆತು

ನಾರುತ್ತಿರುವ ಭವಿಷ್ಯದ ನಾಳೆಗಳನ್ನು

ವರ್ತಮಾನಕ್ಕೆ ತರಲು

ಹೆಣಗುತ್ತೇನೆ

 

ಕತ್ತು ತುಳಿದು

ಉಸಿರು ನಿಲ್ಲಿಸುವ

ಹರಾಮಿ ಹುನ್ನಾರಗಳ ಮೀರಿ

ಗರಿಕೆಯಾದರೂ ಸಿಗಲೆಂದು

ಆಸೆಯಿಂದ ಕೈ ಚಾಚುತ್ತೇನೆ

 

ಕಂಡರೂ ಕಾಣದಂತೆ ನಕ್ಕು

ಅಬ್ಬರಿಸುವ ಜೀವರೂಪದ ವಿರೂಪಗಳ

ಕೇಕೆಗೆ ಬೆಚ್ಚಿ ಭಯದಿ ಬಿಕ್ಕುತ್ತೇನೆ

 

ಸಾವಿರ ಸಂಕೋಲೆಗಳ ಬಿಗಿಬಂಧದಲ್ಲಿ

ನರಳುವ ನಿತ್ರಾಣ ದೇಹಕೆ ಕೊಂಚ

ಶಕ್ತಿ ತುಂಬಿ ,ಒಂದಿಷ್ಟು ಬೆಳಕು

ತೋರಿಸುವರಾರು ಎಂದು 

ಬಿದ್ದಲ್ಲೇ  ಬಡಬಡಿಸುತ್ತೇನೆ

 

ಸಂಚು ಹೂಡುವ ವಂಚಕ

ಭೂತಕಾಲದ ಇಕ್ಕಳದಲ್ಲಿ

ಸಿಕ್ಕು ಮತ್ತೆ ಮತ್ತೆ ಸಾಯುತ್ತೇನೆ