ನಾಳೆಗಿರಲಿ ಎಂದು
ಎತ್ತಿಟ್ಟುಕೊಂಡ ನನ್ನ
ಕೆಲವು ಕನಸುಗಳು
ಬದುಕು ಸಿಂಗಾರಗೊಂಡ
ಸಂಭ್ರಮದಲ್ಲಿ ಮರೆತೇ ಹೋಗಿವೆ
ನಿಸ್ತೇಜ ಕಣ್ಣುಗಳಲ್ಲಿ , ನಿಶಾಚರ ರಾತ್ರಿಗಳಲ್ಲಿ
ಸಿಕ್ಕು ,ಬಿಕ್ಕುವ ಏಕಾಂತದಲ್ಲಿ
ಗೆಳೆಯನಂತೆ ಆತುಕೊಂಡ
ಜೀವನ್ಮುಖಿ ಕನಸುಗಳು
ಸುಖದ ಕನವರಿಕೆಯಲಿ
ಕಳೆದೆ ಹೋಗಿವೆ
ಅಲ್ಲಲ್ಲಿ ಬಿದ್ದು ಇನ್ನೆಲ್ಲೋ ಎದ್ದು
ಒಂದಿಷ್ಟು ಪಡೆದು ,ಒಂದಿಷ್ಟು ಕಳೆದು
ನಿರ್ಲಿಪ್ತವಾಗುವ ಮುನ್ನ ಮನಸು
ಕೈ ಹಿಡಿದು ಕಾಪಾಡಿದ ಕನಸುಗಳು
ಮಾತಿಲ್ಲದೆ ಮರೆಯಾಗಿವೆ

ಇವಳಪ್ಪುಗೆಯಲ್ಲಿ
ಸುಖಿಸುವಾಗಲೆಲ್ಲ
ಅವಳ
ನೆನಪುಗಳು
ಮರುಕಳಿಸುತ್ತವೆ ..

ಹಿಂದಿನ ರಾತ್ರಿ
ಅವರುಗಳು ಸುಖಿಸಿದ
ಗುರುತುಗಳನ್ನು
ಬೆಳಗಿನ
ನಾಜೂಕು ಗಾಳಿ ಸದ್ದಿಲ್ಲದೇ
ಗುಡಿಸುತ್ತಿದೆ
ಈಗಷ್ಟೇ ಮಂಪರಿನಿಂದ
ಎಚ್ಚೆತ್ತ ಸೋಮಾರಿ ನಗರ
ಮತ್ತೆ ರಾತ್ರಿಗೆ ಕಾಯುತ್ತಿದೆ
ಈ ರೊಟೀನು ಚಕ್ರಕ್ಕೆ
ಸಿಕ್ಕ ಮನುಷ್ಯನ ಆತ್ಮ
ಸತ್ತು ಯಾವುದೋ ಕಾಲವಾಗಿದೆ ..

ಇಲ್ಲಿ ಕಾಲವೂ
ಉಸಿರು ಬಿಗಿ
ಹಿಡಿದು ಚಲಿಸುತ್ತದೆ
ಅದೆಷ್ಟೋ ನಿಟ್ಟುಸಿರುಗಳ
ಯಾತನೆಗೆ ಮರುಗಿ
ಒಮ್ಮೊಮ್ಮೆ
ನಿಂತೇ ಬಿಡುತ್ತದೆ
ಹಸಿ ಹಸಿ ಕಾಂಕ್ಷೆಗಳ
ಬಿಸಿಗೆ ಸಿಕ್ಕು
ಅರೆ ಸತ್ತ ಭ್ರೂಣಗಳಿಗೆ
ಸಾಕ್ಷಿಯಾಗಿ
ಈಗ ಎಲ್ಲವೂ
ಎಂದಿನಂತೆ
ಹೊಸ ಮುಖಗಳಲ್ಲೂ
ಹಳೆಯ ಸುಖದ
ಕನವರಿಕೆ
ಅವರೀಗ
ನಾಳೆಗೆ ಕಾಯುವುದಿಲ್ಲ
ಆಕಾಶ ದಿಟ್ಟಿಸುತ್ತ
ಅವಕಾಶ ಹುಡುಕುವುದಿಲ್ಲ
ಕೆನ್ನೆಯ ಮೇಲೆ ಕಣ್ಣೀರ ಗುರುತೆಲ್ಲ
ಕರಗಿ ಅಗ್ಗದ ನಗುವಿಗೆ
ಒಗ್ಗಿ ಹೋಗಿದ್ದಾರೆ
ಬಜಾರಿನ ಬಯಕೆಗಳು
ಬರಿದಾಗುವ ತನಕ
ಕಾಲವೂ
ಅವರಿಗೆ ಜೊತೆ ನೀಡುವ
ಮಾತು ಕೊಟ್ಟಿದೆ .

ನೀನು ಒಳಗೆ ಬರೋದಾದ್ರೆ
ಈ ಹೃದಯದ ಬಾಗಿಲಿಗೆ
ಆ ಚಂದ್ರನನ್ನೇ ತೋರಣ
ಮಾಡಿ ಕಟ್ತೀನಿ
ಖಾಯಮ್ಮಾಗಿ ಒಳಗೆ
ಇರೋದಾದ್ರೆ
ನಿನ್ ಬದುಕಲ್ಲಿ ಯಾವತ್ತು
ಅಮಾವಾಸ್ಯೆ ಬರದಂಗೆ
ನೋಡ್ಕೋತೀನಿ

ಪುಡಿಗಾಸಿಗಾಗಿ
ದಿನವಿಡೀ
ಚಪ್ಪಲಿ
ಹೊಲೆಯುವವನ
ಕಾಲಿಗೆ ಸರಿಯಾದ
ಸೈಜು
ಇನ್ನು ಸಿಕ್ಕಿಲ್ಲವಂತೆ ...

ನನ್ನ ಹಿಂಗೆ ಕೊಲಬೇಡ ಕೊಲಬೇಡ ಕೊಲಬೇಡ ಲೇ
ನನ್ನ ಹಾರ್ಟು ವೀಕು ವೀಕು
ನಿನ್ನ ಲವ್ವು ಫೇಕು ಫೇಕು
ಲ ಲ ಲ ಲ ಲ ಲ ಲ ಲ ಲ ಲ
ನಿನ್ನ ನೋಡಿ ಫಾಲ್ ಇನ್ ಲವ್ವು
ನೀನು ಗಿವ್ ಮಿ ಓನ್ಲಿ ನೊವ್ವು
ನನ್ನ ಹಿಂಗೆ ಕೊಲಬೇಡ ಕೊಲಬೇಡ ಕೊಲಬೇಡ ಲೇ
ಡೈಲಿ ಶೇವು ,ವೀಕ್ಲಿ ಮೂವಿ ,ಮನಸು ಫುಲ್ ಜುಮ್ ಜುಮ್
ಮಂತ್ರಿ ಮಾಲು ,ಪಿ ವಿ ಆರು ಎಲ್ಲೆಲ್ಲೂ ಹಮ್ ತುಮ್
ಲ ಲ ಲ ಲ ಲ ಲ ಲ ಲ ಲ ಲ ಲ
ಕೈಲಿ ಬಿಯರು , ಹಾರ್ಟು ಚೂರು
ನಾಟ್ ಕಮಿಂಗು ಡ್ರೀಮ್ಸ್
ನನ್ನ ಹಿಂಗೆ ಕೊಲಬೇಡ ಕೊಲಬೇಡ ಕೊಲಬೇಡ ಲೇ

ಮೇರ ದಿಲ್ ಕಾ ಗಲ್ಲಿ ಗಲ್ಲಿ ಮೇ
ನಿನ್ನ ನೆನಪು ಹರಿದಾಡ್ತಿದೆ
ಹಗಲು ರಾತ್ರಿ ಆಂಖ್ ಮೇ
ನಿನ್ನದೇ ರೂಪ ಸರಿದಾಡ್ತದೆ
ನೆನೆಸ್ಕೊಂಡ್ರೆ ಸಾಕು ಚುಪ್ಕೆ
ನನ್ನ ದಿಲ್ ಕ ಒಳಗೆ ಪುಳಕ
ಪ್ರೀತಿಸ್ತೀನಿ ಅಂತ ಆಪ್ಕೆ
ಹೇಳೋದಿಕ್ಕೆ ನಡುಕ
ಒಪ್ಕೊಂಡ್ ಬಿಟ್ರೆ ನನ್ನ ಪ್ಯಾರ್ ನ
ನೀನೆ ಮೇರ ದಿಲ್ ಕ ರಾಣಿ
ಕಣ್ಣಲ್ಲಿ ಕಣ್ಣಿಟ್ಟು ನೋಡ್ಕೋತೀನಿ
ದೂಸ್ರ ಮಾತೇ ಇಲ್ಲ ,ನಂಬು ನನ್ನಾಣೆ ..

ಜಡ್ಡುಗಟ್ಟಿದ ದೇಹ
ಬಿರಿದ ಅಂಗಾಲು
ಸಿಮೆಂಟು ಧೂಳಿನಲಿ
ಬದುಕಿನ ಕನಸು ಮಸುಕು ಮಸುಕು
ಚೀಲಕ್ಕೆ ಕೊಕ್ಕೆಯಿಟ್ಟು
ಹೆಗಲ ಮೇಲೇರಿಸಿ
ಹೆಜ್ಜೆ ಮುಂದಿಟ್ಟಾಗ ಎದೆಯಲ್ಲಿ
ಹಸಿವಿನ ರುದ್ರ ನರ್ತನ
ತಿಂದ ಅನ್ನ ಅರಗುವುದಿಲ್ಲ
ಅವನಿಗಾಗಿ
ಯಾವ ಜೀವವು ಮರುಗುವುದಿಲ್ಲ
ಎದೆಯೊಳಗೆ ಕೆಂಡವಿಟ್ಟುಕೊಂಡವನ
ಸಂಕಟಕ್ಕೆ ಸಹಕಾರ ನೀಡಲು
ಕಣ್ಣೀರಿಗೂ ಮನಸಿಲ್ಲ ..